La 26-an de julio 1887 aperis la unua lernolibro de Esperanto «Международный языкъ. Предисловiе и полный учебникъ
por Rus,o,j» .Tiu ĉi tago estas festata kiel naskiĝtago de Esperanto.
Gratulojn al ĉiuj esperantistoj okaze de la festo! Karaj geamikoj, sanon, fortojn, energion kaj entuziasmon al vi por aktive agi por kaj per Esperanto!

Nikolaj Ivanoviĉ Ĥoĥlov

Nia Lingvo
Nia lingvo ĉerpu belon el la amo,
Belon, oferitan de la ĝoja kor' –
Estu ĝiaj lumaj vortoj la balzamo,
Kiu viŝas sulkojn de la frunto for.

Nia lingvo ĉerpu forton el la kredo
Je la unueco de la homa gent',
Kiu ĝin akceptos danke por heredo
Kaj ekuzos iam en paciga sent'.

Nia lingvo estu ilo de la a g o ,
Kiun kreas vole bono aŭ malbon';
Viva energio – sed ne sarkofago,
Lerte elĉizita el rigida ŝton'.

Nia lingvo estu l i n g v o , sed ne ludo,
Nek maŝina uzo de la radikar'
En ŝablonaj dogmoj de la sekta prudo,
Kun ridindaj trajtoj de l’ enua star'.

fonto